ഇല്ലാത്തത്, ഉണ്ടാക്കപ്പെടാതെ ഉണ്ടാവില്ല

 സന്ദേഹം : 

ഇല്ലായ്മയിൽ നിന്ന് ഉൺമയിലേക്കു വന്ന വസ്തു തനിയെ (കാരണം / സ്രഷ്ടാവ് ഇല്ലാതെ) ഉൺമയിലേക്ക് വന്നതല്ലെന്ന് പറയുന്നതിന്റെ ന്യായമെന്ത് ? നമ്മുടെ മൈന്റിൽ സെറ്റ് ചെയ്യപ്പെട്ടത് കൊണ്ട് നമുക്കങ്ങനെ തോന്നുന്നതായിരിക്കാൻ സാധ്യതയില്ലേ ?

നിവാരണം : 

വസ്തു ഇല്ലായ്മയിൽ നിന്ന് വന്നുവെന്ന് പറഞ്ഞതിൽ നിന്നും, അതിന് സ്വതേ അനിവാര്യമായ ഒരു അസ്ഥിത്വം (necessary Existence) ഇല്ലെന്നു മനസ്സിലാക്കാം കാരണം : സ്വതേ അനിവാര്യമായിരുന്നെങ്കിൽ ആദ്യം ഒരു ഇല്ലായ്മ അതിനുണ്ടാകില്ലല്ലോ.

ഉൺമയിലേക്ക് വന്നുവെന്ന് പറഞ്ഞതിൽ നിന്ന്, അത്, സ്വതേ അസംഭവ്യമായ (Impossible) കാര്യമല്ലെന്നും മനസ്സിലാക്കാം. 

മറിച്ച്, ഉണ്ടാവാൻ ഉണ്ടാക്കൽ ആവശ്യമായി വരുന്ന, ഇല്ലാതാവാനും ഇല്ലായ്മയിൽ തുടർന്ന് പോകാനും ഇല്ലാതാക്കലോ ഉണ്ടാക്കാതിരിക്കലോ ആവശ്യമായി വരുന്ന, സംഭവ്യമായ (possible) ഒരു കാര്യമാണത്. എങ്കിൽ, തനിയെ എങ്ങനെ അതുണ്ടാകും !

1+1= 2 എന്ന് നമ്മുടെ മൈന്റിൽ സെറ്റ് ചെയ്യപ്പെട്ടത് കൊണ്ട് നമുക്കങ്ങനെ തോന്നുന്നതായിരിക്കാൻ സാധ്യതയില്ലേ എന്നൊരാൾ ചോദിച്ചാൽ ആ ചോദ്യം നിങ്ങളിൽ അശേഷം സംശയം ജനിപ്പിക്കുകയില്ല. ബോധ്യമാണെന്ന ബോധ്യത്തോടു കൂടിയ ബോധ്യമാണ് അതെന്നർത്ഥം. അത്തരമൊരു സുഗ്രഹ ബോധ്യമാണ് ഇല്ലായ്മയിൽ നിന്ന് ഒന്നും തന്നെ തനിയെ ഉണ്ടാവില്ലെന്ന ബോധ്യം

അബ്ദുൽ ജലീൽ സഅ്ദി രണ്ടത്താണി