യഥാർത്ഥ കർത്താവ് അല്ലാഹു തന്നെ

യഥാർത്ഥ കർത്താവ് അല്ലാഹുതന്നെ

✍️അബ്ദുൽ ജലീൽ സഅ്ദി രണ്ടത്താണി

സന്ദേഹം :

നടന്നു പോകുന്ന രണ്ടു പേരിൽ ഒരാൾ വാഹനമിടിച്ച്‌ മരണപ്പെടുകയും അപരൻ രക്ഷപ്പെടൂകയും ചെയ്യുന്നതിൽ നിന്ന് ദൈവം ഒന്നിലും ഇടപെടുന്നില്ലെന്നും തികച്ചും ഭൗതികമായ കാര്യ കാരണ ബന്ധങ്ങളാണ് അടിസ്ഥാനമെന്നും മനസ്സിലാക്കിക്കൂടെ ?

നിവാരണം :

എ. ഭൗതിക ലോകം സംവിധാനിച്ചത് അല്ലാഹുവാണ്. (‘ദൈവാസ്തിക്യം ഒരു ധൈഷണിക വിശകലനം’ ‘സ്രഷ്ടാവ് ഒരു ധൈഷണിക വിശകലനം’ എന്നീ പോസ്റ്റുകൾ കാണുക) എങ്കിൽ, ഭൗതികമായ കാര്യകാരണ ബന്ധവും തുടർഫലങ്ങളും അവന്റെ ഇടപെടൽ തന്നെയാണെന്നു മനസ്സിലാക്കാം.

ബി. ഭൗതിക കാരണങ്ങൾ, അനാശ്രിതമായ കാരണങ്ങളല്ലെന്ന് ധിഷണ സാക്ഷ്യപ്പെടുത്തുന്നു.

ഉദാഹരണത്തിലൂടെ നമുക്കിത് വിശദീകരിക്കാം : ഒരു വസ്തുവിന്റെ ഇരുവശത്തും തുല്യഅകലത്തിൽ രണ്ട് അഗ്നികുണ്ഡം സ്ഥിതിചെയ്യുന്നുവെന്നും അതിൽ ഓരോന്നും അതിനെ ഭസ്മമാക്കാൻ പര്യാപ്തമാണെന്നും കരുതുക. 

അത് കത്തിക്കരിയുമെന്ന് ഉറപ്പാണ്. എന്നാൽ, രണ്ട് കാരണളും ഒന്നിച്ചു പ്രവർത്തിച്ചുവെന്നു പറയാൻ പറ്റില്ല. എന്തുകൊണ്ടെന്നാൽ, ഫലം നിലവിൽ വരാൻ ഒരു കാരണം തന്നെ പര്യാപ്തമാണ്. കാരണം ഫലം നിലവിൽ വരാൻ സമ്പൂർണമായ രണ്ടു കാരണങ്ങൾ ആവശ്യമില്ല. അല്ലെങ്കിൽ, അവയിൽ ഓരോന്നും എങ്ങനെ സമ്പൂർണ കാരണങ്ങളാകും/ ഒരു കാരണത്തിന്റെ രണ്ട് അംശങ്ങളല്ലേ ആകൂ.

ഒരു കാരണം മാത്രമാണ് സക്രിയമായതെന്ന് പറയാനും നിർവാഹമില്ല. കാരണം : സമാനമായ രണ്ടു കാര്യങ്ങളിൽ ഒന്നിന് മറ്റൊന്നിനേക്കാൾ തനിയെ (ബാഹ്യ ശക്തിയുടെ ഇടപെടൽ ഇല്ലാതെ) പ്രാമുഖ്യം ലഭിക്കില്ല. 

സി. ഭൗതിക കാരണങ്ങൾ, അനാശ്രിത കാരണങ്ങളല്ലെന്നു മാത്രമല്ല, അവ ഉപരിപ്ലവമായ / ബാഹ്യമാത്രമായ കാരണങ്ങളാണ്, തുടർ ഫലങ്ങൾ അല്ലാഹു നേരിട്ട് സൃഷ്ടിക്കുകയാണ് എന്നു കൂടി ഇലാഹീ വചനമെന്നു സ്ഥിരീകരിക്കപ്പെട്ട പരിശുദ്ധ ഖുർആൻ അസന്ദിഗ്ധം പഠിപ്പിച്ചിട്ടുണ്ട്. «അല്ലാഹു സമസ്ത സൃഷ്ടികളുടേയും സ്രഷ്ടാവാണ്..»

അബ്ദുൽ ജലീൽ സഅ്ദി രണ്ടത്താണി