സ്രഷ്ടാവ് : ഒരു ധൈഷണിക വിശകലനം
പ്രവിശാലമായ പ്രപഞ്ചം ഔചിത്യ
പൂർവം സംവിധാനിച്ച സർവ ശക്തനും സർവ്വ വിജ്ഞനുമാണു ദൈവം. ദൈവാസ്തിക്യം ദാർശനികമായി നമുക്കു വിശകലനം ചെയ്യാം.
...................................................................................
പ്രപഞ്ചം അനാദിയല്ല.
+
അനാദിയല്ലാത്ത
ഏതു വസ്തുവിനും
ഒരു സ്രഷ്ടാവുണ്ടാകും.
=
എങ്കിൽ, പ്രപഞ്ചത്തിന്
ഒരു സ്രഷ്ടാവുണ്ടാകും.
...................................................................................
പ്രിമൈസ് 1
...................................................................................
പരിവർത്തന വിധേയമാണു പ്രപഞ്ചം. അനാദിയായിരുന്നുവെങ്കിൽ, പരിവർത്തനം അതിൽ സാദ്ധ്യമാകുമായിരുന്നില്ല. കാരണം, പ്രാപഞ്ചിക പരിവർത്തനം അപ്പോൾ, മൂന്നിലൊരു രൂപത്തിലാണു സംഭവിക്കുക.
1. ഏതൊരു ഗുണം നിലവിൽ വരും മുമ്പും ഒരു എതിർ ഗുണമെന്ന ക്രമത്തിൽ അത് പശ്ചാത്ഗമിക്കുക. അപ്പോൾ ഏതു ഗുണം നിലവിൽ വരുന്നതും അനന്ത ഗുണങ്ങൾ തീർന്നു പോയതിനു ശേഷമായിരിക്കും. അനന്ത ഗുണങ്ങൾ / തീരാത്തത്രയും ഗുണങ്ങൾ തീർന്നു പോകൽ വൈരുദ്ധ്യമാണ് / അസാദ്ധ്യമാണ്.
2. പ്രസ്തുത ശൃംഖല, പ്രപഞ്ചത്തിന്റെ നിർഗുണാവസ്ഥയിൽ നിന്നു പ്രയാണം തുടങ്ങുക. ഇത് അസാദ്ധ്യമാണെന്നു വ്യക്തം.
3. അനാദ്യ ഗുണങ്ങൾ നിലവിലിരിക്കെ അനാദ്യേതര ഗുണങ്ങൾ നിലവിൽ വരുക. ഈ രൂപവും അസാദ്ധ്യം. എന്തു കൊണ്ടെന്നാൽ, അനാദ്യേതര ഗുണങ്ങൾ നിലവിൽ വന്നപ്പോൾ അനാദ്യമായ പ്രകൃതം പ്രപഞ്ചത്തിനു കൈമോശം വന്നു / ഇല്ലാതായി. എന്നാൽ, അനാദ്യമായ ഉൺമയുള്ള ഒരു കാര്യവും ഇല്ലാതാവില്ല.
കാരണം, അനാദിയുടെ ഉൺമയ്ക്ക് നാലേ നാലു സാധ്യതകളാണുള്ളത്.
1. നിരുപാധികം, സ്വതേ അനിവാര്യം.
2. നിരുപാധികം, അനിവാര്യത്താൽ അനിവാര്യം. ഇവ രണ്ടും ഇല്ലാതാവുകയില്ലെന്നു വ്യക്തം.
3. സോപാധികം, അനിവാര്യം.
4. സോപാധികം, അനിവാര്യത്താൽ അനിവാര്യം.
അനാദിയുടെ ഉൺമയ്ക്ക് പുതു ഉപാധി സാദ്ധ്യമല്ല. അനാദ്യ ഉപാധിയാണെങ്കിൽ, നിരുപാധിക ഉപാധിയിൽ കലാശിക്കുകയും ചെയ്യും. ഇല്ലെങ്കിൽ മുകളിൽ സൂചിപ്പിച്ച പശ്ചാത്ഗമനം സംഭവിക്കും.
നിരുപാധിക ഉപാധിയിൽ കലാശിക്കുന്ന അനാദിയും അനിവാര്യം തന്നെയാണ്. എങ്കിൽ, സോപാധികം അനിവാര്യമായവയിലും ഇല്ലായ്മ സാദ്ധ്യമല്ല. ചുരുക്കത്തിൽ, പ്രപഞ്ചം അനാദിയായിരുന്നുവെങ്കിൽ, ഒരു വിധേനയും പരിവർത്തനം അതിൽ സാദ്ധ്യമാകുമായിരുന്നില്ല.
...................................................................................
പ്രിമൈസ് 2
...................................................................................
അനാദിയല്ലാത്ത / ഇല്ലായ്മയ്ക്കു ശേഷമുണ്ടായ ഒന്നും സ്വതേ അനിവാര്യമല്ല. അല്ലെങ്കിൽ, അത് അനാദിയാകുമായിരുന്നുവല്ലോ. എങ്കിൽ മറ്റൊന്നു കാരണമാണതു നിലവിൽ വരുക . മേൽ കാരണം അനിവാര്യമല്ലെങ്കിൽ, അതും തഥൈവ.ആ ശൃംഖല അനുസ്യൂതം നീണ്ടു പോകില്ലെന്നു തീർച്ച.
ഒന്നാമത്, ശൃംഖല അനന്തതയിലേക്കു നീളുന്ന പക്ഷം, ശൃംഖലയിലെ ഏതൊരു കണ്ണി ഉൺമയിലെത്താനും അസംഖ്യം കണ്ണികൾ, /തീരാത്ത കണ്ണികൾ, തീർന്നു പോകണം. അസംഖ്യം കണ്ണികൾ, / തീരാത്ത കണ്ണികൾ, തീർന്നു പോകില്ലെന്നു വ്യക്തം.
രണ്ടാമത്, ശൃംഖലയിലെ എല്ലാകണ്ണിയും പരാശ്രിതമാണ് എങ്കിൽ, ശൃംഖല തന്നെ നിലവിലില്ലെന്നു / നിലവിൽ വന്നിട്ടില്ലെന്നു വരും. ഉദാഹരത്തിലൂടെ വിവരിക്കാം.
എ. പൂജ്യത്തിന് അനാശ്രിത മൂല്യമില്ല. അസംഖ്യം പൂജ്യങ്ങൾ വിഭാവനം ചെയ്താലും ഫലം പൂജ്യം തന്നെ.
എന്നാൽ: പൂജ്യം, എണ്ണൽ സംഖ്യയിൽ കലാശിച്ചാൽ അതിനു പരാശ്രിത മൂല്യം കൈവരുന്നു.
ബി. ഒരാൾ മറ്റൊരാളെ ചാരി നിൽക്കുന്നു. അവൻ മൂന്നാമനെ, മൂന്നാമൻ നാലാമനെ..... ഈ ശൃംഖല, ആരെയും ചാരാതെ നിൽക്കുന്ന വ്യക്തിയിലോ ഭിത്തിയിലോ മറ്റോ അവസാനിച്ചില്ലെങ്കിൽ
ആരും ചാരി നിൽപ്പുണ്ടാവില്ല.
...................................................................................
കൺക്ലൂഷൻ
...................................................................................
അനാദിയല്ലാത്ത ഏതു വസ്തുവിനും അനാശ്രിതനായ ഒരു സ്രഷ്ടാവ് ഉണ്ടാകുമെന്ന നിർണയനത്തിലേക്ക് ഉപര്യുക്ത വിവരണം നമ്മെ നയിക്കുന്നു.
...................................................................................
അബ്ദുൽ ജലീൽ സഅ്ദി രണ്ടത്താണി
No comments:
Post a Comment